相信好多人都聽過Practice makes Perfect同練習10,000小時既定律，亦有好多神童每天練8-10小時然後贏得國際比賽既故事。無錯，練得多時間當然對比練得少有分別。但喺心理學上有一樣野叫Inverted-U Theory (Yerkes & Dodson, 1908)，當給自己壓力過多時候，效果就會開始下降。所以，點先最理想呢？
或者先分享一個自己小故事。喺讀書最後一年，跟了多一個新老師。上第一堂時候，就好正常咁聽完就俾咗啲意見然後番去自己練習。到第二堂，吹咗一陣，老師就問每日平均練多少呢？自問自己唔懶，所以聽倒尼個問題心諗大件事了，老師就分享了以前自己讀書故事，最後話「我覺得你需要再多啲練習」。
接住一個星期，我每日既生活變成 早餐-練習-午餐-練習+上堂-晚餐-練習，大家應該都估倒結果會係點吧！老師上堂好驚訝，可能係有改善咗，但同時全身都變得過份拉緊了。老師尼一次提出一個重點想法，練笛如同運動員每天刻苦鍛練。
練笛 = 做gym?
無錯，尼一刻如果問我，我絕對認同練笛等於運動訓練。吹笛所運用既身體部份包括手指、眼、口腔、舌頭、呼吸系統，仲有最重要既腦。吹笛既每一刻都可算是multi-tasking，所以絕對需要有系統地訓練同慢慢控制每一個動作。特別重要的手指和舌頭，它們各自是多組肌肉，但不會每組肌肉有自己既腦袋去控制，所以要靠我地去訓練佢地！
咁就等於要日練夜練？
其實，尼個問題無特定答案，因為每個人有既意志力同興趣不同，這正正影響每個人每天最佳理想練習時間。較要知道的是，即管你係LingLing，可以每日練40個鐘 (未明尼個可以去Youtube睇下一個叫TwoSetViolin既頻道)，人既腦係有限容量，平均最多兩個小時真的需要一個休息才能繼續有效吸收資訊，年紀較少時間仲會愈短。所以呢，直落8小時番工式練習可以話基本上是沒有效果，就算有都唔係最理想和大效果。
學懂把練習分成多節
分多節練習 (block) 可以係大大提升練習效率既方法，概念就係將一天分成幾個block，每block有一節練習，那麼練習間有足夠休息，讓身體和腦袋能夠好好處理所有資訊 (Rubin-Rabson, 1940)。
當然每一節要有一定長度來使該節有意義。例如你每天計劃1小時，如果你覺得平時到45分鐘左右便開始分心，那麼可嘗試分為兩節30分鐘，早間可作休息、吃晚餐或先作其他日常需要處理既事情。
如果係音樂系學生，每天基本需要5-6小時既練習，那麼可考慮分成3個2小時練習block。早上2小時作warm-up和技巧訓練，下午2小時可作練習曲和樂曲練習，到最後一節可能練下餘下的東西或聽聽錄音和研究一下鋼琴伴奏樂譜。(當然，咁係理想狀態，喺香港每分每秒都係咁忙碌既社活的確有啲難，可能到外國讀書或者住喺郊區啲就可以有尼個習慣)
無分年齡級別，最重要係設定練習日程
其實，有效既練習重點在於有針對性既練習，所以無論你係到邊一個演奏程度，設定練習日程 (practice journal) 相信係為你帶來轉變既第一步。練習日程係一個為自己度身定造既「課程」，練習前制定一系列內容，練習後作一定反思，想想明天內容有何需改變。
今日嘗試舉兩個例子既日程編排。
a) 1小時 (適合小朋友)
年紀較少既學生當然需要家長幫忙一下，但我會建議最遲小四以上便應該習慣自己定下基本計劃，畢竟尼個都係學會自我管理既一環。
上一回講過基本工對長笛演奏十分重要，所以就算只是1小時，每日都必須由根本做起。以下係一個可行既分配:
10 分鐘 長音練習 (如: De la sonorité和新學的指法)
10-15 分鐘 音階 (如: Major, minor, appreggio, in 3rd/4th/5th, 7th chords, chromatic等)
20-25 分鐘 練習書 (如: Rubank, A Tune A Day或Etude等等)
15 分鐘 樂曲演繹 (或一些完整旋律)
b) 4小時 (適合準備報讀音樂系既朋友和決心要改善技巧的人)
至於每天會花較多時間練習的人，可按需要選擇需要專注既內容或按比例縮短或增長每部份時間。
20-25 分鐘 Warm-up (如: Reichert, T&G, De la sonorité或其他慣常Warm-up內容)
20-25 分鐘 音色練習 (如: Moyse Tone Development等)
20-25 分鐘 靈活性練習 (如: Moyse Etude et Exercises等)
20-25 分鐘 吐音練習 (如: Moyse School of Articulation等)
20-25 分鐘 手指練習 (如: Trevor Wye Book 2 & 6, T&G等)
30-45 分鐘 練習曲 (Etude) (可能是大約每周一首或跟自己老師建議)
45-75 分鐘 樂曲演繹 (每天設定特定樂章或某一段落) (或許亦需預留時間準備樂團選段)
10 分鐘 小總結 (檢討今天練習，確保某些技巧已經掌握)
日練夜練 vs 死練爛練
講完咁多，應該都明白有系統既日練夜練會有理想效果，但沒有編排既死練爛練只會構成反效果，輕則手痛腳痛，重則唔會想再練。相信玩緊樂器既你都唔會想突然無咗動力吧！
再者，練習其實唔一定練樂器才算是一部份，有一個方法叫mind practice，亦即係透過思考音樂，都可以幫助我們熟悉要演奏既樂曲，可以既話聽吓CD留意細節，亦都係練習既一部份。
希望今次既討論可以有助你改變現，甚至突破現有既樽頸位。
下一次，我地探討一下音準既概念。
~~~~~~~~~~~~~~~~~~~~~~~~
延伸參巧
(Yerkes & Dodson) https://psycnet.apa.org/record/1908-10099-012
快速參考版Wikipedia: https://en.wikipedia.org/wiki/Yerkes–Dodson_law
(Rubin-Rabson) https://psycnet.apa.org/record/1940-04947-001
Comments